Zootopia

Zootopia

首先,我要多謝「乾.香港」既邀請。無佢,我無呢篇文。

做專欄作家,先要唸專甚麼欄。

情情愛愛既野,不是我杯茶;(唔係我無經驗,真係唔係)

旅行遊記個D,對我黎講並不適合。(唔係我無錢,真係唔係)

於是,我都係做返老本行-得閒吹水,嬉笑怒罵。

呢排有D無聊,亦有D屁股痕,見銀包無哂銀紙,剩低張開始腐爛既UA戲飛禮券,就轉身行入戲院,睇左套《優獸大都會》(Zootopia)。

最先知道有呢套戲,全因一隻樹賴。套戲既內容,不作劇透,簡單綜合,就係有一隻兔仔好想成為警察,但係呢個城市既警察一直都係由大隻些少既動物去做,從來唔會有兔仔狐狸之類。其他人屢勸佢都堅持,希望靠調查一宗失蹤案去證明自己。結局,當然佢成功左。而成套戲賣既,係典型既美國夢 (American Dream) ,「只要有夢想,凡事可成真」之類,好迪士尼,好美國。

笑,佢幾好笑,但賣一個用到爛、用到臭,由宋朝循環到而家既主旨,一黎好很悶,二黎個人認為有些少過時。一直以黎,美國都賣住「只要肯努力,夢想可成真」,迪士尼如是,愛迪生的故事如是。個人絕對贊成。古語有云:「人無夢想同條咸魚有咩分別。」(Stephen Chow, 19xx) 可惜,因為呢個理想賣左幾十年,我開始見到有副作用。

大家開始認為理想大哂。

可能我比較現實,亦都生活係現實。我相信夢想,我相信努力,但我唔相信因為我有一個夢想就可以唔理其他人、其他野。

戲入面既兔仔,為左堅持自己既理想,三番四次唔理其他人既感受,就係為左做警察。有不如意事就立即憤怒,跟住發脾氣,再而自把自為。雖然佢因為咁樣而衰左,但係忠言逆耳,大家都享受住Confirmation Bias既世界裏面,好多人都只會接收到「堅持夢想」呢個信息。

拎住「夢想」呢一支旗,我絕對贊成要披荊斬棘,亦唔會阻止橫衝直撞,但係當遇上障礙物、障礙人,唔好下下一野轟埋去,好傷架。


想第一時間看到,或是回顧以往Dr Who的文章,可到Dr Who的Facebook page

Comments

SHARE
Previous article情人節
Next article寂靜中的聲音(一)
2016年4月正式成為《乾媒體 Dry.HK》博客之一。 不務正業,身為醫療行列人員卻天花龍鳳,甚麼都說一大輪。

NO COMMENTS