我在香港追愛的日子

IMG_4128

「你見唔見到我琴晚send比你既snapchat啊?」我問我個friend。

「見到啊,唔想應你。」反左一個大白眼,啊灼蔑嘴對住我。

「點解姐…我好難先約到佢出黎架~仲要係夜晚,佢仲送我返屋企,嘻嘻。」我自我陶醉緊。

啊灼突然之間發出一股低氣壓,隔離一路食花生既芽芽用手打左我一下,示意我收聲。

「做咩喎⋯⋯」我其實知道咩事,不過扮下無知廢事啊灼又鬧我。

「你又話放低既?係隻手放低左係你大脾度係咪?」啊灼憤怒值已達89%

「我放唔低。」好細聲咁講左呢句,因為預左比人鬧。

「放唔低你老_啊,廢到你。做兵比人笑,做魚比人釣仲做到你咁心甘命抵。咩事先你依家,教唔聽係咪啊⋯⋯」

「得啦得啦,」我打斷左啊灼,「我唔會再好似以前咁迷戀佢架啦,放心啦。」

「收_啦好唔好啊,你由琴晚開始個花痴樣無停過。」係一邊唔講野既芽芽都話埋一份。

「嗱,我同你講,認真,你如果再係咁落去,以後我地兩個同你其他fd都唔會想理你。」啊灼

「無錯,啊灼深得我心,」芽芽拍左一下大脾,「大家叫你唔好做魚比人釣叫左幾萬次,你唔聽都算仲要直播同無限重播你比人釣既過程,有無病。」

我比佢地問到啞口無言。

「其實話唔定,佢連釣我魚都唔想呢,只不過係佢肯應我WhatsApp,我已經可以high一陣,其實,可能,應該…佢只係出於禮貌咁應我機。」我望住同A君既對話版面,笑住咁同我兩個老死講。

 

佢係A君,一個我鍾意左一年半,差唔多兩年既人。

唔係男神級,唔靚仔,有少少毒。

我同啊灼芽芽講既時候,佢地兩個用食左_既表情望住我,的確,作為外貌協會榮譽主席既天秤座,會鍾意A君真係好難。

所以我終於知道情人眼裡出西施,原來真係存在。

只不過我只係一隻兵,um…做兵要填form,應該話我係一條魚,er…A君好似無釣緊我……

算,我都唔知應該點稱呼自己,姑且稱為烏龜–因為烏龜咬住左一樣野就唔會鬆口。

 

本身啊灼同芽芽以為我鍾意幾日就會算數,點知我鍾意左咁耐,甚至乎表白左,於是佢地知道既時候都係望住智障咁望住我。

 

其實,同我一樣既人都知道,呢種所謂既等待根本唔會有結果,真係一齊到的話一早就一齊左,何必等到2046都未得。

真正既愛情只需要雙方等待遇上對方,之後就係鈉遇上水,「boom」一下就產生左化學反應一齊左。

鍾意你既男仔係唔會想你等,由得你等,無論係保住咩心態由得你等到唔想等既人,唔該你唔好再蠢落去,放低對方啦好嘛。

 

//「我忽略自己就因為遇見你」//

 

道理我地都識得講,但真正既一面就係,你會希望自己有一日感動到佢(其實你只係感動到自己);

你會係想放棄果陣抱住過分樂觀既心諗話唔定過幾日就得米(其實你比藉口自己唔放低姐);

你會係佢回你message果陣開心到拍枱(其實電話另一頭既佢面無表情咁打幾隻字);

你會因為佢唔回你而沮喪(其實佢一早見到但係唔想覆你);

你會不斷諗話題然後open topic係你end topic又係你搞出黎既(其實你既話題無一樣中到佢既興趣點);

你會驚自己煩到佢或者令到佢內疚(其實佢望住低能咁望住你);

你會不斷改造自己令自己進步(其實你變成點佢最多都係當你normal friend)

 

「算啦你,無用架!」嗱,得把口話自己你最叻架啦,做唔到呢至弊。

 

//「我難過的樣子就沒人看到」//

 

講心底果句,鍾意一個人又點會有原因,又點會去計較自己付出左幾多,你只係當自己做緊自己鍾意做既事,只不過個目標係一個人,結果掌握係對方而唔係你手上。

你話追夢,你努力就得,追一個人,佢點頭先得,你話邊個難d?無得比較架,點知你追既人鍾唔鍾意你。

但係,一個人既青蔥歲月得果幾年,你有衝勁同熱血去追愛都係得果幾年,唔去試又點知結果。

只不過無論結果係點都好,好聚好散,好來好去,要記住有一首歌既歌詞係:

 

//「用力愛過的人,不該計較」//

 

P.S. 寫呢篇文既時候,我係開住JC既「說散就散」同埋薛之謙既「剛剛好」黎邊loop邊寫,看官們不妨開住歌一路聽一路睇。

Comments

SHARE
Previous article以前‧以後
Next article我和DSE的愛恨情仇
日常中理性成一個感嘆號,獨處時感性成一個問號。 虎系女子兼話癆一名。 在愛情的路上守株待兔。

NO COMMENTS