關於去exchange,我想講嘅係⋯

20160731_192123「住hall,上莊,拍拖,走堂,part time」以上為香港嘅大學五件事,而唔少大學生都盡力做足呢五件事,希望可以喺大學四年入面拼盡無悔。但其實係咪咁樣就夠?定係想喺呢個聲稱人生最自由嘅時間入面做得更多?見得更多?

 

首先講講自己嘅故事,我喺JUPAS無offer,碌咗去太空讀asso,咁就miss咗u life中好似最光輝嘅year 1同year 2。後來有ugc offer落黎地球,入讀year 3,讀多兩年就可以畢業,而且無浪費多餘時間,同同年經jupas入大學嘅人一齊畢業。不過既然入到大學,我就唔想庸庸碌碌讀番大學要求學分就畢業,所以我就喺大學做唔同嘅事,例如住hall、去study tour,而最近喺機緣巧合之下,就去咗美國summer exchange。

 

黎到美國,好似前所未有咁自由,想做乜就做乜。喺呢個暑假,除咗讀書之外,都做到唔同嘅事,試到一啲香港試唔到或者唔敢試嘅野,例如坐喺水泡上面隨流水漂浮丶坐轉到頭都暈埋嘅過山車丶玩過離心力強嘅水滑梯丶試世界各地唔同嘅汽水丶親身了解美國近代史同埋美國黑人奮鬥史等等,每一刻都有好深嘅體驗。尤其嘗試一啲刺激活動嗰陣,玩之前都好緊張,但玩完就勁輕鬆!

 

參加exchange嘅另一好處就係識到唔同地方嘅人。今次個summer exchange program,就識咗五湖四海嘅年輕人。大家一齊上堂丶一齊睇書丶一齊去玩,不知不覺咁就一個月,走嗰一刻大家都唔捨得大家,有時就算諗如果可以時光倒流,重新再識過大家就好啦。除了同學,我地都同老師們成為好朋友。雖然短短一個月,但自己嘅社交網絡都擴闊咗唔少。

 

去得外國exchange,無論exchange前丶exchange緊,定係exchange後,旅行一定係另一重頭戲。好老實講,大家嘅exchange period好大機會係成世人離開香港最長嘅時間,而且喺香港只有奴役嘅社會之下,亦無乜幾可可以重臨舊地。難得依家人在外國,當然想見下世面。所以就算係一人遊定係三五知己一齊去,一定會既開心又離忘。

 

一個人離開香港走到外地旅行或者生活,當然都會將香港嘅生活壓力置緒腦後,而一班exchange student都係一樣。不過,既然去得exchange,同時就要暫時放棄香港嘅舒適圈,例如(穩定的)part time丶一班留喺香港嘅朋友嘅re u丶舒適嘅家居。同時返到香港之後,就要由零開始重拾香港高壓力嘅生活,由適應生活丶搵工或者返學,每一步都會好掙扎。而且好多人去exchange嗰陣都洗大咗,返到香港又要節衣縮食,甚至可能加劇家庭經濟負擔。

 

綜合哂咁多,如果咁多位大學生可以負擔到exchange嘅洗費(不論係自己賺錢,家人或者學校贊助),不妨去外國exchange。無論短期丶長期丶遠丶近都好,以exchange student出走,得到嘅裨益同樂趣都會比以旅者身份出走。因為呢一刻你唔咁樣出去,分分鐘你一世都唔可以咁樣玩法。

 

後記:關於去exchange,我想說的是除咗以上幾點之外,大家廚藝都會大有改進。因為為咗慳錢,你無得唔煮。

Comments

NO COMMENTS