長途挑逗 #6

10013365_308104029346021_8463566679289802882_o

長途挑逗 #6 – Storyteller馬交文

進入考試季節,我同celia各有各忙,莫講話見面,whatsapp都唔多。

嚴格黎講,我同celia只係普通朋友。我一直都記住呢一點。食過一次飯,send過幾多個whatsapp,分享過幾多個笑話,根本唔係呢段關係既重點。

重點係,佢覺得我係乜,我又覺得佢係乜。任何形式既關係從來都係雙向既,一廂情願既想法只會令人墮入做兵既陷阱。如前所述,中學時期我經常以為人地同我食幾次飯,會既個短訊,就係一種暗示。後來我先明白到,重點係食飯既時候,send whatsapp 既時候,你同佢做過啲乜,諗過啲乜。

食飯本身就已經千變萬化,食乜野?食幾耐?點樣約?點解食?食完點樣散?有無後續?成件事根本就係一門學問。

從來我都係一個謹慎既人,對住celia,我情願等佢比訊息我。呢個質素既女仔,年中主動追既,猴擒既,肯定唔小。我無需要做其中一個。

就算我比訊息,都要留後路。無人會抗拒多個靚女朋友。講到尾,我唔想做先動情嗰個。停留係flirt既階段,大家都係為好玩,起碼大家都有理智。一旦超越咗呢個階段,搞成點,從來都無人預計到。

可能你會話,你都唔係鍾意celia既。我會答,用鍾意唔鍾意去處理愛情關係,人會忽略好多
野。

換句說話講,人會無咗理性,無咗自己。你中意人,人唔中意你,你永遠都係有付出,無回報。

做兵同挑逗,對當時既我黎講,就係係呢度唔同。唔明白呢樣野,就算你有另一半,都會係兵。

兵男女都做得,砲兵,將軍都係兵。

所以,我先會係一個禮拜三既夜晚禁頭痕。
下個禮拜一佢生日。

送唔送禮物,點樣送,一大堆問題。是但答錯一條,都可以帶黎更多問題。我想繼續flirt落去,就要答得啱。諗諗諗諗諗。

星期五晚,老豆有dee局,啊媽同我出街食飯。食完飯,阿媽話想行下街,我同佢行入一間時裝店。

係阿媽揀杉試既同時,我係度研究櫃入面既飾物。「先生有咩幫到你?」「無我都係望下睇下姐。」「想買野比人?女朋友?」
我無應售貨員姐姐;我唔係好識應佢。

阿媽出到黎,見到我望住條手鍊,就問:「有新女朋友?無聽你講既?」
我答:「都唔係…」
阿媽唔放過我:「唔係定未係啊?定係你想佢係?」
我攤開雙手:「我唔識答呀,有無得問現場觀眾?」
阿媽望望啲手鍊:「話,出手唔低喎,志在必得咁。不過,後生細女,又唔係你邊位,唔使禁重手。你重手咗,佢都未必識欣賞,可能會嚇親添。」
阿媽望望手機,跟住又話:「如果佢因為份禮物而鍾意你,呢個女子都好無謂姐。禮物好容易試到一個人既。」

阿媽做乜突然智者上身?不過又有道理喎。
我決定用份禮物試一試celia。

 

 

原文刊於 HKU Dry Club Facebook 專頁

Comments

SHARE
Previous article長途挑逗 #5
Next article長途挑逗 #7

NO COMMENTS

LEAVE A REPLY