試過拎一大疊錢掟人未?我試過,掟嗰個仲係我老母!

今日我放工返到屋企,feel到有d唔妥——嗯…無錯,應該係燒燒地。於是我就訓係梳化昏迷咗。

唔知過咗幾耐(事後先知10分鐘都無),我畀屋企人嘈醒,矇矓中我聽到呢句說話:

…畢咗業就好揾份長工!…你家姐當年無人請驚到!…你返呢份兼職揾得嗰…

聽到呢度,我怒髮衝冠憑欄處,一掌推開房門,係銀包拎出一早禁定既一疊500蚊,衝出客廳對住我老母幾張幾張掟埋去:

呢到3000,就家用!呢度2000,就……

(其實精準d講,出於對老母既尊重,我只係掟落地下…)

掟完,我老母冷笑幾聲:

我稀罕你d 錢?我揾得多過你啦!我驚你唔敢揾工咋!你有種掉晒佢!

我老豆補多句:

我驚你無錢拍拖、無錢買樓咋!

我好似好老瀟咁回咗一句:

我掉得就預咗無咗呢舊錢!你地唔要就掟落街!

當然最後就無人掉錢落街啦。

黎到呢度,應該好多人覺得我係仆街仔、打靶仔。呢d主觀評論無得拗,我亦唔會理你地眼光,我只想扮下倒敍法講幾句我d錢點黎。

自考完DSE最後一科以黎,直至今日,基本上我唔洗返中大既日子都返緊唔同part-time,無返工既日子只係因為無工返(例如紅日),而唔係因為我去咗旅行或者唔想返。

第一份,柒仔。2分鐘training教我禁機收錢,其他乜柒都無教,叫我自己學喎。日日畀客屌,隔日畀老細屌,自己收埋咗d貴價貨話唔同我講仲屈係我偷懶唔上貨。過咗收工時間叫我留低個幾鐘——無糧,再屈係我企圖呃佢鐘而賴死唔走。

第二份,上貨架。做咗2年既暑假,能夠服務香港首富誠哥,其實幾光榮無咩好講,只係鋪頭請唔夠人,我chur起黎(自願,揾錢啫) 直踩過0730開鋪到2230收鋪一兩個月。

第三份,倉務。Year 2暑假去咗青衣既物流倉搬貨分貨,最長0800踩到2230咗右啦,除咗訓就係搭車同返工,都係自願,同同事又相處得開心,無咩啫。

第四份,文員intern。呢份工幾好,0900到1900,係柒在intern一毫子都無啫。(WTF!?)

第五份,而家呢份,都係文員。非常好pay,就衰在每星期返得3日。

第六份,跟車。由year 2 sem 1 至今我一直返緊另一份part-time,空窗期又dayoff 或者星期六日靠佢揾食。

仲有堆濕濕碎碎既student helper或者炒散,不能盡錄。

大學生唔補習做搬貨抵死?你話點咪點囉。我一樣有做過補習(唔係呀嘛,男既都有家長咁請!? 係呀! 執到啦!),不過part-time密密揾其實賺仲多,星期六日又無文職返;而且我覺得幫得就幫唔想呃錢,之後轉咗去義補發揮正撚樣(唔係掛…),你吹咩?其實我唔係好鍾意錢。

每年完sem唔洗返學,未考試、未交paper,我老母就會日日趕我去揾工,仲叻到幫我四圍R邊度請人。當然啦,我地呢d低下階層,R極咪又係牛工。揾錢啫,咪當強身健體囉。

講真,呢4年我都無畀過家用,係抵屌。但屋企人話明唔洗,當然我亦無問佢地拎過一毫子用。

今年畢業喇,一樣啦,唔洗返學就等於要揾工。不過我突然好攰,我唔想16歲返工返到65歲都未停過呀!我想抖下——返住part-time先啦,當放返次暑假囉。

咁就當然唔撚得啦!我老母由我無再返學嗰一日起(中大出名早完sem呃錢),日日——係日日!日日鬧我唔揾工,鬧我日日係屋企無所事事,一星期7日返得2日工咋仆街!淨低5日(其實我係返3日文員,再返2日搬貨,得返2日)係屋企打緊paper,佢就話我打機唔揾工。無錯呀,一開口就算講緊隔離張師奶定電視劇情,都可以返番去話我唔揾工。

錢對於我呀媽黎講,絕對比命重要。病可以睇醫生,但唔可以請假。曬你可以搽潤膚(暴曬傷咗,搽潤膚霜第二朝乜事都無,認真),但唔該你唔好唔搬貨。

掐指一算,咦,完咗sem其實3個星期咋喎,咁我都唔係畀佢鬧咗好多次啫,一日3次咪63次咗右,用詞惡毒極都有限,重覆又重覆煩d啫,發咩老脾?返咗4年兼職,驚你做雙失廢青好合理吖!相反,3個星期唔揾長工無咗6000蚊喎,係咪抵屌呢?

當然抵屌啦。養咗你22年,幾百萬唔洗還?你父母講錢,你講心?你敢講抖?你老豆驚你無樓結婚,你日日part-time 畀女嫌cheap,竟然女都溝唔到!

原來呢咁多年日日返工返學,我未有過夢想,甚至無過咩人生(其實童年都無,離題唔講)。為咗唔太鍾意但父母好鍾意既錢,為咗做乖仔,咁就四年光陰。

父母生你養你,係要還番,甚至可能係為咗等你大咗養返佢先生你出黎。

天生我材必有用,無腦都唔該你去做苦力揾錢。錢都揾唔到既麻煩你摺埋,唔好晒米飯。

等你揾到真銀,將咁多年既怒氣化作一張張500掟晒係佢地身上,你又開心,佢地又高興。雙贏,why not?

講親情,you are so simple, sometimes naive!

如果你同父母一直帶住矛盾生存咗咁多年,又或者為父母迷失過既,我想請你用自己方式,將自身經歷傳揚開去,話畀上一輩既人知,我地有我地既路要走——只係因為想做乖仔乖女,我地先背棄夢想存在咗咁多年,新一代先咁多壓抑。

如果你覺得我憨鳩既,我唔會否認。

Comments

NO COMMENTS