我和DSE的愛恨情仇

image

DSE,好深刻既三個字,我諗我呢世人最愛既、最恨既、最永誌不忘既,就係DSE。

DSE害人不淺,係中五既暑假開始,我既書枱,書櫃,甚至係地下,都放曬past paper既問題同答案,仲有一大堆,本本都有成吋厚既書同練習。

學習用品佔領左我間房,我同自己講,捱埋佢,考完DSE就dum曬佢地。

於是我日復一日咁做卷,溫書,做卷,背書,再做卷……我覺得自己已經係機械人,不過為左個大學學位…唉算!我做!

Study leave 果陣我已經比人話我讀到癲左,原因係有一日同個fd一齊溫書果陣我恰著左,我個fd搖醒我之後話:「你點解要趴係度背書?」
「下?我頭先訓左覺喎。」
「屌你啦!你頭先成課神經系統背左一次。」佢一副唔信我既表情,「唔係喎,你唔係讀到發夢都讀啊嘛?」
「我諗我…應該係…掛…」
「痴線架?」佢變左個擔心樣,「你考唔到大學既話會唔會放棄自己架…」
「會,一定會。厭世tim!」

有d事呢,你愈擔心就愈會成真,到左放榜果日,嗯,best5夠做,不過英文個lv2好刺眼咁囉。

我有咩可以做?喊?的確我有喊,仲想喊到死,可惜生命力太強我喊左半粒鐘都仲好清醒。

好 清 醒 我 自 己 入 唔 到 大 學 。

就係咁,我做左我最唔鍾意做既asso仔,讀既科都係啊媽揀既,無計啦,follow佢先唔洗比人鬧,我唔想係自己受重創既時候仲比人日日用言語傷害。我想死姐,都要死得有尊嚴D。

於是我抱住希望讀asso,發現原來係更深既絕望。

我既熱誠同靈魂已經消磨到得反d渣。

不過我都係死唔去,雖然遺書都寫好左,工具都準備好。

但就係死唔去,令我更勇敢。

亦都令我明白到,人生在世,無挫折既話就無眼淚可以流,無眼淚流既話同條咸魚有咩分別。

睇到呢度你應該知道,呢篇,又係一篇雞湯。

但係齋雞湯係無用的,作為過來人,等我講下你個心態應該點調整,同埋有咩可以做,正所謂「比生活強上既時候點都要做d野黎阻止佢進一步侵犯你。」(亂講的)

首先,提前predict自己最好、正常同失手既分。根據唔同情況下你會拎到既分,黎排好3個版本既jupas排位。唔好等到放榜之後先排,因為你唔知你考成點,無論考得好定差,你既情緒同理智都會有偏差,所以我覺得見到成績先排係唔明智的。你預早排好佢,到時follow黎填,包無死。

其次,去搵下space, hkcc, ive等等學院既即場收生地點,準備好5-6張身份證副本,行出校門前影印5-6張成績通知單副本。八達通一定要入夠錢,至少500,身上帶500現金同筆,最好帶一本比你墊住黎寫野即書。我放榜果日係唔知點算,因為我無做上述既事,所以當下只係想輕生同自毀(不過呢個係後話啦,有機會再開篇點樣比香港教育制度折磨既文)。
記住記住,一定要帶叉足電既尿袋!!!!!!!因為你唔知等offer要等幾耐,同埋你如果係自己一個去既話你會驚,想搵你陪你傾計。

我呢就android機新電池用到無電,用iPhone既小朋友記得帶啦。有fd係interview完左就返屋企(佩服佢既灑脫),反正Space會係第二日比個sms你話叫你去返center度拎offer交錢。

最後啦,想同大家講,如果你考得好既話,請你暫時收埋喜悅,去關心你身邊成績未如意既朋友,你既關心唔一定要係慰問,可能陪佢傾下計舒緩佢情緒已經足夠;考得唔好都唔緊要,點都會有路行,唔好覺得自己唔得or人地睇你唔起,當下要相信世界上所有人都係天使,咁你先會渡過到呢一關。

想當時我拎住個成績幾好睇,但因為我既執念同崩潰,反而要一個考得比我差好多既朋友黎安慰我,到依家我都覺得好抱歉。

所以講反人性既真實面,我要你當下相信所有人都係天使既作用,係為左你自己撐落去。過後唔該你分清楚身邊既好人同賤人,因為經歷大事你先會見到人性最「光輝」既一面。可能你本身以為佢唔care你既人會送上百分之一百二十既關心,亦可能你一直依賴緊既人會冷眼旁觀仲耻笑你睇得好心涼。我試過,所以希望你地都藉呢個機會去將你既人際圈洗一次牌,就當係成長既階段。

祝大家入到U,直接做個地球人。科科~

Comments

SHARE
Previous article我在香港追愛的日子
Next article和你一起的生活 Part 1
日常中理性成一個感嘆號,獨處時感性成一個問號。 虎系女子兼話癆一名。 在愛情的路上守株待兔。

NO COMMENTS