尋找比卡超

等左成年,Pokemon GO終於面世!身在澳洲嘅我緊係即刻download落黎玩啦!真係唔講得笑,一玩就上癮。我本身鐘意摺響屋企都變左日日出街玩,仲要跑去啲有櫻花嘅PokeStop度等小精靈。

今日我出去超市度買野補倉,唉自己住最煩就係買餸,又重又貴…咦?係喎開隻game玩下先。哇!對面馬路有PokeStop有櫻花!要快啲過去捉精靈先得!

「咇!!!!!!」

仆街!有架車衝緊過黎!我係咪要死啦?呀呀呀!!!

「呀!」

「無事啦,你快啲打番開對眼先啦。」

下?點解會有人講廣東話嘅?我上左天堂呀?

「一擘大眼就會死架喇!我唔想死呀!」我係咁擰頭係咁嗌

「放心啦小姐,你冇死到呀。」

我打番開對眼,見到眼前有一個戴粗框眼鏡,一頭攣髮嘅普通男仔…

「小姐?你冇事呀嘛?洗唔洗送你去醫院呀?」

「下?」我望一望自己先知自己趴左響佢度。

我即刻彈起身「唔好意思呀!你無事呀嘛?」

佢自己都起左身「我ok呀,但係你流緊血喎…」

「咦係喎,唔緊要啦好小事姐…呀…多謝你救左我呀,不如我請你食飯當報答你呀!」

「唔洗啦,小意思姐。你都有玩Pokemon GO呀?玩還玩要小心睇路呀。」

「嗯我知道架喇!多謝你呀!」

 

「哎呀!」到我行果陣先發現原來腳上面嘅傷口咁鬼痛。

佢即刻行番黎「你冇事呀嘛?不如我扶你去診所消毒傷口先啦。」

我又推卻唔到,個傷口又真係好痛,唯有比佢扶啦。

佢一手拎左我袋野食,另一手就扶住我去診所。我咁大個女都係第一次同男人有咁近嘅接觸。呀!!點算呀!好緊張囉!

佢可能都察覺到氣氛有啲尷尬,所以就開始聊我講野。

「你GO玩到幾level呀?」

「12啦!」

「好快喎!隻game只不過係出左兩日咋喎!」

「係呀!我每日做gym之前都響街度行成個鐘捉精靈架。你都有玩架?」

「有呀,不過冇你咁勁,得10咋!」

 

一講GO我就停唔到口,就咁樣傾傾下佢add埋我Facebook,仲送埋我番屋企添。

「好啦你小心啲啦,唔好掛住玩啦。」

「知道啦!我下次唔敢架喇。」

「你住依度咁雜,又成日夜晚搵精靈,好危險架喎。不如咁啦,以後你夜晚去捉精靈果陣叫埋我啦,有咩我都可以幫你呀嘛!」

「下…咁唔係咁好喎…」

「反正我都係住附近咋嘛,我又要升level,一於咁話啦,今晚Facebook搵你!拜拜!」

佢就好似一陣風咁走左…

 

如是者,我休養期間佢都會同我share下咩地方會捉到啲咩精靈,我又教下佢打道館嘅攻略。到我好番果陣,佢又真係走黎同我行,仲偷偷地跟我入去做gym。

我地一齊玩左成幾個星期,由一開始只係響屋企同gym附近行,都變左唔同時間,去唔同地方捉精靈,仲搵到好多之前未去過嘅地方,我真係覺得自己成個小霞咁,同小智周圍去。

依段時間我地傾左好多計,雖然佢個樣毒毒地,又成個雀巢響個頭度,但係佢心地好善良,又幾可靠,有困難果陣都會幫我。同埋我發覺佢好細心架,又幫我帶尿袋,仲特登帶埋IPhone線比我,有時過馬路佢都會特登拉住我,驚死我又冇睇車XD

 

「喂!快啲換衫出黎啦!」佢無啦啦打比我同我講。

「做咩呀?我洗緊碗呀。」

「有人見到你附近有比卡超呀!我宜家黎接你,快啲呀!」

「好呀好呀!我今次唔會再比佢走甩!即刻換衫!」

太好啦搵左咁耐,我心愛嘅比卡超終於出現!我黎喇!

到我落到樓下,咦?唔見佢嘅?

之後佢就whatapp我,話佢等唔切行左先,仲send左location比我叫我行快啲。

到我行到過去,條路咁熟口面嘅?好似係第一次見佢,比佢救左我嘅地方。但係我手機又冇顯示有比卡超,唉如果走左我一定會好傷心架 :’(

當我響隻game度搵緊比卡超嘅蹤影,佢又whatapp我叫我望對面,我即刻抬高頭,見到對面有隻比卡超!不過…係人咁高嘅比卡超?佢望一望左右,就嗌住「比卡比卡!」咁樣跑過黎,佢手上面仲拎住個精靈球。當隻比卡超跑到過黎,佢遞左個類靈球比我,我接左之後佢終於開口…

「你夢昧以求比卡超出現左喇!你快啲用個精靈球收服佢啦,只要你收服到,佢就係專屬於你嘅比卡超,陪你上山下海,捉其他小精靈,同挑戰者比賽,仲會打道館!」

我拎起個精靈球,向住佢擲……差啲擲中左個頭!

佢接住左個精靈球嗌「比卡!我愛你呀!比!」搞到我紅都面哂。

「好啦,你已經比我收服左,以後你就要聽哂我話,乖乖地做我隻比卡超喇!」

「知道喇比!」

 

 

作者有感:

其實隻game真係好好玩!等香港有得玩果陣記得download喇!到時我地一齊走出屋企,尋找專屬我地嘅比卡超啦 😀

 

pokemon-go-pikachu-starter-752x440
來源:http://www.letspokemongo.com/

 

Comments

SHARE
Previous article文一心語錄,一日一感動 (10)
Next article多少年
在澳洲生活的大學生 沒有優美的文筆,只有一顆熾熱的心 是傳說中的麻甩系少女(厚面皮XD) 時而理性,時而感性 並對生命有著不一樣的看法 希望我的文字,我的幽默 能帶給你一些不一樣

NO COMMENTS