[奪命金] (三之一)

10273800_296476657175425_2149740031463579813_n

[奪命金 – Storyteller 馬交文] (三之一)

初黎報道,先等我自我介紹。我叫阿文,因為個人麻煩,所以朋友都叫我做馬交文。我讀社科,二年級,其他野,都係普普通通。因為人在外國,飽食總日,加上周街都係番文,為免無所用心,中文生疏,決定寫下故仔。內容真假,我都答你唔到,反正眼看都未為真啦。

先講一個外國的故事。故事既主人不幸地就係我。

究竟港男同港孩係乜野一回事,我以前見識小,真系唔知。但係自從我學聖經做左慈善既撒瑪利亞人之後,我確信眼界呢樣野係由經驗累積。

正如老江湖一樣,有經驗不等於是好事。

話說我人在外國,一個人住。可能你會話”一個人住緊係為左食_啦”。無錯,我屋企 附近有個街市,而我三兩日就會落去買餸煮飯。至於食_,真系無,外國既月光並吾 係禁圓。一個人住使費大,連買廁紙都只係買單層。正因為禁,當我知道有人問我可吾可以出租床位幾日,好心又等錢使既我自然不假思索,學張學友係旺角卡門講,即刻簽約。我唔知道既係,我其實抓左好多蟲入屎忽。如果有逃學威龍二既細龜同我講“我好似 有不祥既預感”,我可能都唔會見錢開眼。

先介紹一下呢位住客- Samuel,男,三年級,就讀某神科。

在朋友既介紹下, Samuel話要過黎幾日處理私人事,行程都決定得好匆忙。經過幾次面書交談,佢就 到左啦。

面書既Samuel好似都幾斯文,而第一次見面就有點拘謹。 初來異地,Samuel當然要梳洗一下。見到佢步出廁所,我諗住去方個便。但係,我行唔到入廁所。我見到全球暖化加內戰下既荷蘭。 一地都係水,連岩岩洗完既地布都濕哂。地布無掛返好。洗手盤入面有隻衣架同杯… 隻杯重要係我既。我透大氣,無出聲,小便,行出來。Samuel走埋黎問:可唔可以用你個廚房? 無理由煮野食呀,岩岩先請佢食左碟意粉,佢仲話夠食。莫非佢係焚化爐,定係學Breaking Bad整meth? 停止雲遊太虛,我問Samuel原因。佢話要煲珍珠奶茶比個朋友。見佢禁有心,我帶左佢入廚房。

呢個世界好多人唔知道,佢地既生活喜好習慣工作,全部都可能係慢性自殺。開OT 係,不良飲食係,煙酒係。我呢刻都唔知道,帶Samuel入廚房,甚至比佢係度住都 係。

見佢入左廚房,我返房做野。做左一陣,突然一聲巨響。我衝入廚房,Samuel面有 難色,萬二分唔願意我入去。據Samuel既講法,佢見煲水唔滾,就搬開個煲。我屋企用電熱版,類似電磁爐,但 係比較落後。Samuel擺左包珍珠係個版面上面。佢唔知道塊版仲好熱。個膠袋熱溶左,成地都係珍珠,癡到周圍都係。珍珠融咗,就好似一笪笪既鼻屎。我個廚房變左個化糞池。我強裝鎮定,Samuel話會清理好。我可以點姐?逼你食左啲鼻屎?

清理完畢,佢話要再煲。我無反對,經一事蔡一智嘛。

但係我又有點唔放心。我決定再行入廚房。係煲未滾既水入面,我見到好多珍珠。Samuel仲落左包糖,問我點解唔溶。再據 Samuel既講法,佢唔識煮飯。我一直以為唔識煮飯同唔識煮出前一丁係兩回事,我錯左,我太天真太傻。一個大學生,連煲野要等水滾都唔識。邊個話無知唔係罪?本住童軍日行一善的精神我幫佢煲,仲教佢煲。如果地球出現大饑荒,可能係因為我地既下一代唔識煲水,唔識煮食。我一路煲,一路覺得惘然。

究竟我做緊乜?幫個大學生煲真豬奶茶?

點解我會比佢係度住? 第一日就系禁過左去。我感到前所未有的不安和恐懼。 第二日起身,Samuel已經出左去。個廳好亂,我行都行唔到,成地都係雜物。

直頭係臨兵鬥者皆陣列在前。

可能係我麻煩。我忍。反正趕住返學。

 

原文刊於 HKU Dry Club Facebook 專頁

Comments

SHARE
Next article[奪命金] (三之二)

NO COMMENTS

LEAVE A REPLY