大學只有一件事,千祈唔好臭朵!

20 five task

係大學既Ocamp (迎新營) 梗有D環節會提到「大學五件事」,分別係:讀書(定係走堂就見人見志啦),拍拖,上莊,住Hall同埋Part-Time。好多Fresher唔多唔少都會參考呢個表黎規劃下自己4年既大學之旅,但計我話,有一樣野比起呢五樣野係你既U-life都會更為重要;唔係話「大學五件事」唔重要,但如果你做唔到「大學一件事」,你都幾難有機會做得齊「大學五件事」。

咁「大學一件事」究竟係咩呢?就係「千祈唔好臭朵」!如果你已經係大學打滾左一段時間,你一定已經深明呢個道理,而好多時,唔係因為你自己出左事,而係你親眼睇住其他人仆街,漸漸領悟到,唔好令自己仆街既道理。

大學係一個好自由既地方,比左好大幅度既權利你去發揮自我,去決定自己係呢個社會縮影要擔當一個乜野角色,比機會你去塑造自己,追尋自己所求。鍾意social或者溝仔溝女既,大把地方比你yo人,識人,r friend;想追求學問既,大大個Library,一大堆Journal 同Literature,重有好多prof. 比你問書;你要多D私人空間既,少D比人管,又有Hall比你住;未真正做大人,又想扮下管理層同員工,又可去上莊。係一個咁多選擇,咁多唔同機會既花花世界,同時潛藏左好多危機要格外小心,一個唔小心你個朵就會係一夜之間變得街知巷聞。

呢D事可謂大有前車可鑒,臭朵既Cases,小至聲名狼藉既free-rider,大既可以參考前年,City U老鬼Con會反枱Hku 陳冠康 譚振聲選舉黑幕溝女不遂狗急跳牆既HKU厹,講到出名既厹,其實係各大院校真係多不勝數;再睇下Hall/ Society 既Cases,呢期最紅應該不外乎Hku St JohnLee Hall 先後比人錄低左所謂Hall既日常;當然重有D敗類,係可以一野影衰哂成間U啦,好似 Poly U爭Freshman打交事件 等等。(講起City U老鬼反枱,其實筆者覺得果野真係幾有型。)

你個朵一臭,上莊住Hall固之然唔洗諗,無人會想比你個名拖累哂成支莊;如果你係衰厹,甚至連想識下女仔,溝下女既機會都會冇埋,因為D女見到你會即刻調頭走。所以話,個朵一臭,要「大學五件事」就難過登天。

咁點先唔會臭朵呢?筆者只能比一個好好好廢既答案,就係請你「做好自己」。廿一世紀,資訊往往係瞬息之間就能夠散播出去,通天徹地,穿越各個大小Wtsapp group,同時Facebook又設有唔同U專用既匿名爆大鑊Secret Page,真係天網恢恢,你走得去邊。有男/女朋友既,重四圍flirt人就固之然底死;上得莊既,你代表緊你支莊架,麻煩你做野三思而後行;唔想比人唱,先不要其身不正,如果你行得正企得正,就算有人惡意做謠,謠言都自然會不攻自破。

如果你係為人正直,又夠叻夠champ,唔單只唔會「臭朵」,重會「靚朵」。聲名大噪,名揚四海,連隔離Hall/ 隔離科,唔識你既人都可能聽過你既大名,見到「靚朵」人仕本尊都梗會想識一識。當然呢D係極少數,唔係靚仔到做Model,就多數係運動健將為校爭光,咁始終,香港人鍾意睇人仆街多。

你地身邊多唔多「靚朵」人呢?快D Tag哂佢地出黎啦!〝千祈唔好〞Tag D「臭朵」朋友啊!

 

覺得篇文都幾得意既話,記住click下面個like button,等我同你keep updated <3

Facebook page: 水祡零

 

P.S. 打完呢篇文,心血來潮想收集D精彩既大學臭朵史再以生動有趣既文章呈現比大家,親身經歷/ 有料爆既朋友可以 inbox我 😀

放心,我一定會以保護證人同保護犯人身份為前提去寫架,我都唔想臭朵,嘻嘻

Comments

NO COMMENTS