《識少少扮代表》之四——《怪獸女上司》Vol2

《怪獸女上司》二

image

上次講到第一次見到呀姐嘅時候,佢講左幾句令卿卿特別印度深刻嘅說話。其中一句係咁:

「呢個辦公室任何高級過你嘅人都有權叫你做野。」

卿卿咁乖當然照做啦,點知後來就⋯

咁話說當時個部門有四個實習生,兩男兩女。呀姐係部門最大,對落做仲有一個細呀姐。咁呀姐同我地幾個豆丁有一個Whatsapp 群組。有一次,呀姐約我地幾個去佢屋企食飯,喺whatsapp度問:「你地想打邊爐定食小菜?」咁佢問嘅時候我地幾個一齊食緊晚飯吹緊水,大家見到個信息,一時唔知點揀,就諗住轉頭先覆,就出事了。

當然後來大家都唔記得覆啦。到第二朝卿卿起身先醒起,拿拿臨覆番佢,類似係啲冇所謂啦你話事嘅野。

返到去,呀姐召哂我地四個入房,照肺。
「點解宜家啲大學生咁冇禮貌。如果人地响街度見到你打招呼,你都唔會唔應人啦。足足十三個鐘先有人覆我,如果係啲重要事咁點算?咁小嘅事你地都做唔好,我點將啲重要野交俾你地做?⋯」

詳細野唔多講,總之結我地四個要「受罰」。每人嘅懲罰都唔同,卿卿嘅係要寫悔過書。係呀,遲左覆whatsapp要受罰。嗰日卿卿就諗住放工留低寫完封悔過書放喺呀姐枱面先走。咁卿卿好俾心機寫啦,仲希望呀姐心情會好啲,畫左兩個笑哈哈添!(卿卿實在太天真⋯)

咁啱嗰日係放假前夕,部門要段電話錄音,大致係呢幾日放假,有咩緊要事可以點點點,要用英文同普通話(唔記得講,係海外部門)。平時錄音個同事病左,IT哥哥就走入黎話:「卿卿,我見呢度你英文同普通話最好,快啲幫我錄音啦,好快架咋!」我話:「吓⋯⋯但係我寫緊悔過書俾呀姐喎⋯⋯」後尾連直接under呀姐嘅細姐都過黎,摸下我個頭話:「卿卿乖,放低手上啲野幫IT哥哥做野先啦。」

卿卿仲特登send左個msg俾呀姐,大致係IT哥哥要幫拖錄音,我好快幫一幫佢。

放完假之後,卿卿俾人照肺照到呀媽都唔認得。

Comments

NO COMMENTS