image上次喺[去左exchange 就好有國際視野?(上)]提到唔少香港嘅大學生,去到外國度做交換生,成日同其他香港人圍威喂。今次講下香港學生交流嘅時候最叻做咩。

排名不分先後:
周圍去旅行、去名牌outlet掃貨、去餐廳影美食打卡⋯仲有,講埋嗮咩”This is my second home blah blah blah”諸如此類。

卿卿唔反對交流嘅時候去旅行。讀萬卷書不如行萬里路,其實難得去另一個國家生活周圍去下見識一下都好值得鼓勵。不過你去四五個月交流,中間有兩三個月完全走哂堂去旅行會唔會過份左少少。仲有,呢類人一般都係同其他香港人一齊周圍去。

點先知你身邊啱啱去完/仲去緊交流嘅朋友仔係咪呢類人?好簡單,望下佢地Facebook/IG就知。如果你見到佢地次次post相都係同其他香港人一齊,得架喇下次見到佢唔哂問太多佢去交流嘅野,因為呢類人就算去左半年甚至一年交流,生活圈其實冇轉變過,英文亦未必會好左。唔好諗住佢會有好多故仔或者奇聞趣事講你知,因為佢地周圍去好大可能係去平價買名牌或者去食甚麼米芝蓮餐廳。分分鐘去所謂嘅名勝都係純粹走馬看花但求有相打卡。

係呀,好多香港學生去交流必做嘅就係瘋狂買名牌。例如去歐洲的話,佢地唔多唔少都會去一轉意大利;宜家直情大把人衝去英國,英鎊咁平實去啦。可能佢地覺得堆哂啲名牌上身會舒服啲。仲有呀,佢地仲會幫埋哂啲姨媽姑爹三叔公四姑婆買。真係唔明佢地係黎讀書定係黎做代購。如果你細心聽佢地嘅故事,都係離唔開「我喺邊度邊度買左個手袋呀⋯⋯我幫邊個屋企人買左隻錶呀,你知啦嗰度買好平架咋⋯⋯」得喇知你叻喇。

仲有一啲人臨番香港之前例牌會出啲長文post,講個地方點好點好。然後就一句”this is my second home!” 吓?你冇野呀,你喺呢度唔計香港人的話朋友五隻手指數得哂,分分鐘完全冇學過當地語言,冇嘗試過融入當地環境,有一半時間去左旅行,你同我講呢度係你second home?你過客黎架咋。

對住呢種人真係想一巴車埋去。

其實如果你有好好珍惜交流嘅機會,學到嘅野一定比大學四年多。多啲踏出第一步,嘗試唔同嘅事物。遇到外國人,由一句”Hi, I’m _____. Where are you from?” 開始,就可以有話題傾計。英文唔好唔緊要,多啲練習總會有進步。每認識一個來自唔同地方嘅人,你都會有意想唔到嘅收穫。北歐人冷淡怕醜;義大利西班牙人熱情奔放;德國人啤酒當水飲;戰鬥民族其實好有人情味;日本人細心嚴謹;英國人冷嘲熱諷日日有⋯你會發現公主病唔只係港女先有,玻璃心亦唔係強國人專利。

要擺脫香港嘅框框,你先能夠真正去認識世界。唔係去得旅行多就叫見多識廣,而係你用咩心態去遊歷唔同角落;去多幾間米芝蓮唔會幫到你了解嗰地方嘅風土人情,要你自己主動去發掘,然後你會發現,呢個世界仲有好多美好嘅地方等住你去欣賞。

如果你將來有得去交流,請你好好珍惜。交流嘅機會得來不易,唔好白白浪費自己讀書爭取番黎嘅機會哦!

想睇更多卿卿嘅文章,歡迎到https://m.facebook.com/gonhingdaisi/

Comments

NO COMMENTS