《識少少扮代表》之三 — 《怪獸女上司》Vol1

image

話哂都係暑假,一定有唔少同學仔返緊實習。喺三大讀乞食科嘅卿卿憑住少少小聰明同少少人脈,大學四年都番過好幾份實習。由新創公司,到本地大企業,以至政府部門同跨國品牌都有。遇過怪獸上司,試過一個唔小心鑄成大錯。其中,有幾件事最為卿卿津津樂道。

話說卿卿曾經係一個政府部門實習(無薪!),上司係一個單身七十後嘅女人,就叫佢做呀姐。都係嗰句,先君子後小人。呀姐薄扶林大學畢業,當年差少少就攞一級榮譽。做野勤力博盡,效率高,成果好,一個頂幾個,喺政府係high flyer。而且佢見識廣,天南地北都可以講一餐,上至光明會陰謀論,下至占卜星相佢都可以同你吹到水。仲有,佢啲皮膚保養真係得好好,如果係街上見到最多估佢大卿卿十年(嗰陣卿卿好細個架咋)。煮野食又唔差,煮八至十人份量嘅晚餐對佢黎講真係濕濕碎。種種表面跡象顯示,佢係一個出得廳堂,入得廚房,系出名門嘅職業女性。理論上好值得時下年輕人學習。卿卿喺佢身上都學到唔少野架!呀姐,如果你睇緊呢篇文又知我講緊你的話,雖然我地道不同不相為謀,我查實心入面真係幾敬重你架。

講到呀姐咁正,咁點解呀姐係單身呢?卿卿唔想亂猜測,不過睇完之後你可以自己估下。

話說第一次見到佢嘅時候,佢講左幾句令卿卿特別印象深刻嘅說話:

一.「你地宜家啲大家生唔係精英,我地先係精英。」(其實佢仲講左好多宜家啲大學生點差點差,未能盡錄)

二.「呢個辦公室任何高級過你嘅人都有權叫你做野。」

三. 「宜家啲年輕人成日話要work life balance,到底有冇諗過自己值唔值得有呢樣野?Work life balance 係俾啲已經努力做左野好多年,已經喺某啲位置嘅人⋯」(大致係咁)

第一句說話,作為三大學生,真心,好刺耳。我明,佢個年代要讀大學的確好大競爭,比宜家難好多倍。加上佢係薄大,更係難上加難,「精英」二字佢絕對當之無愧。我地呢個年代,的而且確比佢地幸福,上大學容易左好多,事實上又真係有啲大學生質素好一般。但咁踩低我地抬高自己,唔係掛。大佬⋯⋯入三大都唔易架⋯⋯

而第二句,兩星期後引發左一場「罵戰」。咁當然係卿卿俾呀姐鬧啦,邊有還口嘅可能⋯⋯

<待續>

想睇更多卿卿嘅文章,歡迎到https://m.facebook.com/gonhingdaisi/

Comments

SHARE
Previous article終究是愛你的
Next article青蔥歲月-我瘋狂追星的日子
理科出身,中途轉文。四年港大,多多故事。 冇樣野叻,最叻講野。把口幾賤,毫不饒人。 環遊四海,見盡奇事;你有興趣,我講你知! 如果想睇更多卿卿所寫嘅文章,可到https://m.facebook.com/gonhingdaisi/ 多謝支持!

NO COMMENTS