《識少少扮代表》之一 -去左exchange 就好有國際視野?(上)

13453299_10154210157744933_363988971_o

暑假季節,身邊陸續有好多朋友去完exchange 番黎
未去過或者屋企負擔唔到嘅,唔少會一路碌FB/IG睇相,一路得個恨字
大把人覺得,去過幾個月exchange,叫做浸過下咸水,就係見過世面,好有國際視野

我__你收皮啦

冇去exchange而羨慕其他人/恃住自己去過係度自high 嘅人,可以認真諗一樣野

咩係exchange?

Exchange student, 顧名思義係交換/交流生,首先一樣好重要嘅野係同當地人或者其他國際生交流。不過筆者去過兩次exchange, 見到一個好普遍嘅現象,香港嘅大學生大部分好鍾意同其他香港人圍威喂。

間間U都係。

話說有一次去一間好很出名嘅大學summer exchange, 個programme 有成二百幾人,英美澳加度度齊,香港人有大約40個(三大加City Poly,好似有LingU)。唔好講話當地人,肯間中同其他國際生傾計嘅五隻手指數得哂。上堂例牌自成一角坐後排。落堂最緊張係去邊度食野唱K。如果有外國學生想吹水,一係十問九唔應,或者傾少少就傾唔落去。

啱啱到埗你就話人生路不熟,有多個照應啫。如果你全程都係同香港人一齊,不如你留係香港啦。如果你當exchange 係悠長假期周圍玩,跟團/自由行好過啦。係外國同其他香港人玩,係的確比較成世留喺香港好,但又不見得幾有國際視野喎。

呢個時候會有人講,英文唔好識唔到人吖嘛。喂你大學生,唔係要你英文好似鬼仔咁,但讀咁多年書你唔好話我知你連普通日常傾計嘅英文都講唔到。更唔好話怕醜啦,你去得exchange 就內向極有限,怕醜你又識到香港人?

如果一個人去完exchange,識得最多嘅係其他香港人,個人認為呢次exchange 都幾失敗。識當地人其實有機會幾困難,視乎你去邊度。有啲地方嘅人英語能力有限,真係好難溝通,或者當地文化較為保守,要時間打破文化隔閡,呢啲係人知常情。不過你依然可以嘗試學習當地語言,參加學生活動,多留意當地新聞。同其他國際生交流亦係好好嘅學習機會,可以了解多啲唔同地方嘅文化特色。同其他人交流唔係add 下FB 或者 follow 下IG 就算。有冇試過同人地坐低吹十幾分鐘水?或者去酒吧飲杯啤酒?一齊煮野食試對方家鄉菜?甚至一齊做運動/行下山/去博物館?再唔係一齊去其他地方旅行?對方文化背景又如何?應該點交流唔洗我多講,有冇真正交流過自己心照啦。

關於香港學生exchange 仲有好多野寫,依家有啲眼訓,下次繼續。

Comments

NO COMMENTS