《覺唔覺有D朋友入唔到U之後就消失得無影無蹤,好似離開左呢個世界?》

19 no offer

我唔係話個個考唔過DSE/AL既人都係咁,而係特別有一種,佢地讀書一向都唔錯,唔洗點溫都過到哂學校考試,成績一直維持係中上游,未必有野心去讀神科,但係卻從未諗過會入唔到大學,潛藏左一種因從未為成績而擔心過既安全感。入唔到U,對佢地既打擊係非常人可以想像得到,一D本來讀書就唔好,從來都冇希望既人,係唔會明白呢種人入唔到U絕望既心情。佢地可能係Jupas報得差,又可能係考試一時撻Q (一試定生死對岩岩好夠能力讀既人黎講真係好恐怖,因為考試係合能力與運氣既比拼,縱使能力不變,運氣好壞卻永遠捕捉唔到,尤其報Jupas就有如買馬,個賠率年年唔同,你做哂分析,明明呢科易入,今年就偏偏人人都報,拉高個min,反而上年神科就高開低收),無論咩原因都好,入唔到大學對呢d人一定係晴天霹靂,會係佢一生人之中一個最嚴重既打擊,不論佢以前中學係一個幾活躍既同學,甚至學生會會長,校隊既運動健將;一個公開試,就令佢人間蒸發,我唔係話佢真係走去跳樓,而係好似消失左咁,facebook唔會再有update,re-u十年都唔見佢出現一次,變左摺毒頹。如果你就係我講緊果type人士,你一定明白果種失落感;大家原本對你既期望,更突出你呢一刻既絕望,你唔會想再見其他人,覺得自己係一個失敗者,只係想搵一個窿匿埋,從此消失。
更加諷刺係,社會上偏偏就有一大堆太空學位,副學士等等。如果你覺得太空人會有個諗法係:起碼好過連太空人都冇得做果D。咁你就大錯特錯!冇一個太空人係會咁諗,做得太空人既,只會有一個目標,就係落番地球,佢地已經完全喪失左作為人絲毫嘅優越感,無論佢以前有幾活躍,佢地都唔會再係太空站申請做任何職位,上莊/搞學生會/入校隊等等,佢地更加唔會係社交媒體同大家分享太空既經歷,因為對於佢地黎講,比人知到自己做左太空人係比死更難受。新年,清明,呢D要見番一班親戚既日子,佢地幾乎日日發惡夢,最驚D親戚朋友問自己公開試考成點,依加讀邊,等等,真係想搵窿捐。
但佢地心底裡都一樣有一團唔會熄滅既火,就係佢地唯一一個重獲新生既機會,過3爆4,離開太空。筆者突然有感而發,係源於睇到自己一個老朋友,佢係facebook已經死去幾年,去到最近岩岩浴火重生,活躍番,此時此刻,真係好登佢開心。筆者個人非常感觸見得番呢位朋友,同時好概嘆公開試有能致人於死地既強大破壞力。
今年DSE已經考完,7月就放榜,只見云云考生不斷重蹈前人覆轍;人生代代無窮已,江月年年只相似,只盼有一天香港既文化,風氣同價值觀都能夠改變,希望我有生之年能見到香港一次大型既教育改革,為未來既莘莘學子帶來一番新氣象。
我好衷心覺得得:一個人既價值,唔L係咁定架好唔好!。真正殺死呢班人既唔係個考試,而係大家既眼光,核心既價值,社會既期望,城市既風氣,庸俗既制度。
如果你今年公開試唔小心失左手,小弟勸你,千祈唔好做太空人,一定要揀重考!重新黎過唔代表停滯左,休息,係為咗走更遠嘅路,共勉之。

 

鍾意篇文就like下我,支持下;),你輕輕禁一個制,我會開心一日架  <3

如果想睇我其他作品,歡迎入去條link: 水柴零facebook page 

 

Comments

NO COMMENTS